Beschreibung
<p>Il motto da questa ediziun è «<strong>pèr a pèr</strong>»: En il center stattan pèrs litterars e multifars – da text e musica sur differentas linguas sco rumantsch e talian u ladin e tudestg fin a novs inscunters e novas publicaziuns.</p> <p>Da la partida èn tranter auter Janic Maskos e Bigna Guler cun ina performanza litterar-musicala, sco era Selina Poo e Daniel Badraun cun in text interactiv e votaziuns dal public. Natiralmain na dastgan er las novas publicaziuns betg mancar: «Quatter linzöls ed üna taila» (<em>editionmevinapuorger</em>), «Papardets» (Nina Dazzi) e «Carschen uost» (Imelda Coray-Monn). Sco punct culminant ha quest onn lieu era la prelecziun e giuria publica dal Premi Term Bel cun in premi dal public.</p> <p>La sonda saira daventa il public sez il matchmaker: A la show interactiva «Nus tschertgain il pèr perfect» cumbattan quatter pèrs ineguals a moda ludica per las pli bleras vuschs dal public. Bigliets per la sonda saira datti a la cassa da la Postremise.</p> <p>La dumengia stat la litteratura per uffants e giuvenils en il center – cun prelecziuns per e cun uffants e la surdada festiva dal <strong>Premi Term Bel</strong>.</p> <p>Ils Dis da litteratura han lieu ils <strong>6, 7 ed 8 da november 2026</strong> en la Postremise a Cuira. Il program detaglià chattais sin <a href="http://www.disdalitteratura.ch/" target="_blank" rel="nofollow">www.disdalitteratura.ch</a>.</p>